Fanampiana ireo ankizy sy tanora tia baolina kitra any amin’ireo fokontany any amin’ny faritra Menabe Afovoany

Tamin’ny "Fête des Lémuriens" tamin‘ny 30 oktobra 2024 dia nisy lalao baolina kitra notanterahana tao Kiboy ka ny ekipa Kiboy + Tsianaloka no nifandrina tamin'ny ekipa Tsitakabasia + Tsimafana tamin'ny lalao famaranana. Nadresy 1:0 ny ekipa Kiboy + Tsianaloka tamin'izany. Nohon’ny hafanana efa ho 40°C dia nahena 60 minitra fotsiny no nilalaovana. Tonga maro ny mpijery ary nankafy ny lalao.

Lalao toy izao dia manampy amin’ny fanamafisana ny fifandraisana eo amin’ny tanora sy ny ankizy ary ny fiarahamonina. Na dia eo aza ny tsy fahampian'ny fotodrafitrasa na fitaovana dia ny fitiavana ny baolina kitra sy ny finiavana no nahatonga ny mpandray anjara hanohitra ny sakana rehetra.

Be mpitia ny maillot-na baolina kitra any ambanivohitr’i Madagasikara. Izany dia endrika mampiseho ny fitiavana baolina kitra. Lasa akanjo mahazatra ny olona, ary ampiasaina ho an’ny fiainana andavanandro fa tsy amin’ny filalaovana baolina kitra fotsiny.

Mahavariana ny mahita ny olona eny an-tanàna manao maillot-n'ireo klioba iraisam-pirenena lehibe toy ny FC Bayern, FC Barcelona, Real Madrid, Paris Saint-Germain ary ny Chelsea FC. Tazana tsindraindray koa ny maillot-n’ny ekipam-pirenena malagasy Barea. Ny maillot amidy eny an-tsena dia mora lavitra noho amidy aty Europa. Izy ireny dia tsy mitovy kalitao amin'ireo maillot aty Europa.

Ankizy maro eny an-tanàna no te hilalao baolina kitra. Indrisy anefa fa tsy ampy ny rafitra hampiroboroboana ny talenta any ambanivohitr’i Madagasikara. Nanapa-kevitra izahay ato amin’ny Nirina e.V, fa hanohana ny ankizy sy ny tanora amin’ny fanirian’izy ireo hilalao baolina kitra amin’ny alalan’ny fanangonana fanomezana ho fanatsarana ny enti-manana amin’izany. Ny dingana voalohany amin’ny fanatanterahana ny hetahetan’ny tanora manodidina ny alan’i Kirindy dia nanapa-kevitra ny Nirina e.V. fa hanohana ara-bola ny fanomanana sy fikarakarana ny fifaninanana baolina kitra izay hatao any Beroboka ny 25 hatramin'ny 31 Desambra 2024. I Edmond no Mpandrindra any an-toerana ary mpanampy amin'ny fanatanterahana ny hetsika.

Valo no isan'ny Ekipa mandray anjara amin'io dia ireto fokontany ireto: Beroboka, Belamoty, Mandroatsy, Lambokely, Tanandava, Anketrevo, Atsabora, Kirindy, Ampataka, Marofandilia ary Ankoraobato.

Nohon'ny fotoana efa akaiky dia hanomboka eo amin'ny ampahefa-dalana ny lalao. Amin'ny 25 desambra ho avy izao kosa ny antsapaka hahitana izay ekipa hifandona amin’izany.

I Edmond sy mpikarakara miaraka aminy dia efa nahazo ny fankatoavan’ny tompon’andraikitra ara-panatanjahantena any an-toerana sy ny lehiben’ny sekoly katolika ao Beroboka, izay mikarakara ny sakafo mandritra ny lalao.

Ny ekipan’i Beroboka sy ny mponina any an-toerana dia efa tena miandrandra mafy ity lalao baolina kitra ity.

Hanao tatitra momba ny fizotry ny fifaninanana izahay ato amin'ity pejy ity.